الحلقة الثانية: ماذا قال عبد الناصر للسادات بعد وفاتهما - حوار الرفيق الأعلى

أشعل السادات غليونه بصعوبة, أخرج زفير الدخان بهدوء وبدأ الحديث مردفاً ريثما يصغي ناصر باهتمام...

السادات : بص يا جمال! بعد موتك حسيت إن المسؤولية إللي على كتافي ثقيلة قوي! البلد من الداخل كانت مضطربة جداً! والناس كلها كانت بتيكي عليك... العدو قبل الحبيب! وبحكم إني النائب إللي إنت اختارته بمحض إرادتك ووثقت فيه... حسيت إن البلد عمرها ما هتكمل المشار وكل بني آدم فيها يقول ناصر ناصر ورافضين أي بديل ليه! أنا وقفت قدام الملأ وقلت عبد الناصر لم يمت! وكان لازم أطهر النظام من الفساد إللي أنا اكتشفته... استقالات جماعية من الحكومة جاتني بالجمله! دول مش ناس مخلصين, إللي عايز يعمر البلد كان لازم يكمل المشوار! كان في حرب لازم أرتبلها ومجموعات مخربة لازم أتصدى ليها!

قاطعه ناصر فجأة...

ناصر : أنا لو أعرف إنك هاتعمل إللي إنت عملته ده ماكنتش اخترتك نائب ليا وفضلتك على حسين الشافعي! يا أنور أنا كنت شايفك وعارف... إنت أول حاجة عملتها في 1971 إنك بدأت تعمل قنوات اتصال مع الأمريكان, وبدأت بتعديل الدستور وغيرت صيغة مادة عشان ترضي الإخوان المسلمين إللي طلعوا عليك لقب "الرئيس المؤمن"! الحرب كانت هاتقوم بعد فترة قصيرة من موتي... إنت أخرت الحرب 3 سنين ليه؟ كل سنة كنت تقول للناس "دي سنة الحسم" لحد الناس والولاد في الجامعات يئسوا! ما تنساش كمان إنك إنت إللي عملت حاجة إسمها الحرس الجامعي!! ومسحت من التاريخ شيء إسمه حرب استنزاف كان فيها بطولات لا تقل بسالة عن بطولات حرب أكتوبر! 

السادات : أنا أول حاجة كان المفروض أعملها هيا إني ألم البلد وآخد ولادي في حضني! وأنا كنت فاكر إني هاكسب ولاء وود الإخوان لما أرضيهم, بس طلعوا ناكرين للجميل!! الشيء الثاني بالنسبة للأمريكان... أنا كنت لازم ألعب معاهم سياسة, في خطة نفس طويل للخداع الاستراتيجي, لو أخدت الأمريكان تحت عبي إسرائيل هاتترعب! والخداع الاستراتيجي كان يسنوجب إني أطول المدة لحد 73 عشان إسرائيل تحس إننا تراجعنا عن قرار الحرب... وفي ساعة الصفر, أنتقم لشرف الأمة الجريحة من هزيمة 67! وأنا مش مسؤول عن تجاهل المؤرخين لبطولات حرب الاستنزاف! 

ناصر : هم, جميل! وإيه دخل كيسينجر في الحرب؟ خداع استراتيجي برده؟ حد يحارب دولة زي إسرائيل ويروح يستشير وزير الأمن القومي الأمريكي في كيفية دخول أرضه؟ وهل في حد في الدنيا يثق في الدولة إللي بتمول عدوك بالسلاح وتسانده دولياً وإقليمياً؟ يا أنور إنت عارف وأنا عارف إن إللي كان واضع خطة الحرب هو أنا وكل الرجالة إللي كانوا معايا في القوات المسلحة: محمد فوزي, والجمصي, والشاذلي, وعبد المنعم رياض إللي سموه في روسيا الجنرال الذهبي, وحتى المهندس الضابط الصغير إللي اقترح فكرة تدمير خط برليف بالدفع المائي! وكانت الخطة مقسمة إلى ثلاث أجزاء... جرانيت 1 و جرانيت 2 و جرانيت 3!! وكل مرحلة محسوبة بدقة لإزالة آثار العدوان! قمت سيادتك رحت مغير الخطة, عينت الفريق أحمد اسماعيل إللي أنا عزلته قبل ما أموت عشان الإسرائيليين سرقوا من الوحدة العسكرية بتاعته رادار يا انور!! ده يعني إنه غير قادر على أداء المهام بكفأة! جيت إنت في خطاب بعد الحرب تقول إن أحمد إسماعيل هوا إللي خطط للحرب؟!! منك لله! إللي إنت عملته ده تزوير للتاريخ, نسبت بطولة حرب إللس سميتها "أكتوبر" لشخص أنور السادات وأصبح عبد الناصر رمز لعار هزيمة 67 والسادات هو بطل الحرب و السلام... أما السلام ده بقى أنا هأحاسبك عليه حساب عسييير!!

وقف السادات معترصاً ولوح بيده في الهواء ليقاطع ناصر ويصيح بلوم مبرراً ومدافعاً عن نفسه رداً على اتهامات ناصر!