الحلقة الرابعة: ماذا قال عبد الناصر للسادات بعد وفاتهما

رفع ناصر سبابته وتحدث لرفيقه القديم بحزم، مكملا حديثا طال لأيام عديدة: ... وإياك تقوللي إن اللي مصر فيه دلوقتي مش بسبب قرارك...

السادات: أنهي قرار فيهم؟

ناصر: قرار اطلاق العنان للإخوان المسلمين يا أنور! 

السادات: أها! اها! يا جماااال يا جماااال! انت عايز تحملني توابع قرارتي واخطاء حصلت بعد موتي؟ أنا لما طلعت الإخوان والإسلاميين من السجون كان في حكنة لذلك؟

ناصر: حنكة؟

السادات: أماااااااااااااااااااااااااااااااااااااااااااااااااااااال! أنا كنت عايز أمتص غضب القوى الكامنة في البلد! انا كنت عايز أعمل ديموقراطية وأحزاب وأحارب القوى الشيوعية اللي كانوا بيستغلوا اسمك!

ناصر: تقوم تحارب مغفل بجاهل؟

السادات: يا جمال لو كنت مكاني كنت عملت اللي أنا عملته!

ناصر: مستحيل، أنا كنت اعرف كويس قوي ان الإخوان قتلة، والبنا أبوهم بيحاول يكون رسول آخر! وانت كنت دايما تستعين بقوى عشان تحارب بيها خصومك، زي أيام ما اتحالفت مع الألمان عشان تحارب الانجليز قبل ثورة يوليو... فاكر؟

السادات: يااااه يا جمال، كانت أيام حلوة والله!

ناصر: حسبي الله ونعم الوكيل، انا أحملك كل الكوارث اللي مصر فيها دلوقتي، حد كان يصدق ان مرسي يحكم البلد؟

السادات: جمال! البركة في الشباب... التجربة دي ضرورية وكان لازم مصر تمر بيها عشان الناس تعرف عدوهم المتخفي من سنين، الناس اللي كانت متعاطفة معاهم دلوقتي بيكرهوهم...

ناصر: طب والثمن؟ الناس والشباب اللي استشهدوا؟ الدم والاقتصاد المتدهور؟ مصر دفعت كثير قوي بسببك يا انور...

السادات: زي ما لي أخطاء ليك انت كمان أخطاء، ماتلومنيش يا جمال، صدقني مصر جايلها الخير على القريب...

ناصر: أنا مش هاحاسبك على حاجة، أنا هاعول على الشباب اللي يقدروا يرجعوا مصانعي اللي اتباعت بالرخيص والقطاع العام اللي اتخصص على إيد تجار الدين، وربنا يستر يا... يا سي أنور.

اخذ أنور نفسا عميقا من الغليون وسأل: بتقول حاجة يا جمال؟

ناصر: سلامتك... 

السادات: (بهمس) آه لو أطولك يا مرسي!